Մտքի Նորոգում

ՄՏՔԻ ՎԵՐԱՓՈԽՈՒՄ ԵՎ ՆՈՐՈԳՈՒՄ 

Մի անգամ Հենրի Ֆորդին հարցրին. « Ձեր կարծիքով` ո՞րն է աշխարհի ամենալավ մեքենան»: Նա պատասխանեց. « Նոր մեքենան»: Եթե ինձ հարցնեն, թե որն է ամենալավ մտածելակերպը, կպատասխանեմ` նոր մտածելակերպը: Ամենամեծ հրաշքն այն է, որ մարդը կարողանում է նորոգել իր մտածելակերպը: Եվ իմ ցանկությունն է, որ այս գրքի ընթերցանության ընթացքում մեր մտածելակերպը նորոգվի: Մենք պետք է մեծ ուշադրություն դարձնենք մեր մտածելակերպին և թույլ չտանք, որ մեր միտքը լքված մնա և «կոռոզիայի ենթարկվի»: 

Եթե ուշադիր կարդանք Աստվածաշունչը, կտեսնենք, որ Հիսուս Քրիստոսն աշխատում էր Իր աշակերտների մտածելակերպի զարգացման վրա: Նա միշտ հարցնում էր. «Ի՞նչ եք մտածում...»: Նրանք հիմնականում անմիտ պատասխաններ էին տալիս: Հիսուսը շարունակում էր աշխատել նրանց հետ: Մի օր նրանց հարցրեց. « Մարդիկ Ինձ համար ո՞վ են ասում, որ Մարդու Որդին լինի»: Ոմանք պատասխանեցին` Հովհաննես Մկրտիչը, մյուսները` Եղիան, Երեմիան կամ մարգարեներից մեկը, իսկ Պետրոսը պատասխանեց. « Դու ես Քրիստոսը` կենդանի Աստծո Որդին»: Հիսուսը նրան ասաց. «Երանի քեզ, Սիմոն` Հովնանի որդի, որովհետև մարմինը և արյունը չհայտնեցին քեզ, բայց Իմ Հայրը, որ Երկնքում է» (տե՛ս Մատթ. 16.13-17): Այլ խոսքով՝ Հիսուսը ցանկանում էր ասել. « Պետրո՛ս, դու արդեն նորոգված մտածելակերպ ունեցող մարդ ես, որովհետև մարմինն ու արյունը քեզ չհայտնեցին ճշմարտությունը, այլ՝ քո ներսից մի գերբնական ուժ»: Այս գրքում կանդրադառնանք շատ հետաքրքիր հարցերի, որոնք կօգնեն՝ նորոգելու մեր մտածելակերպը: Ի՞նչ է նշանակում` նորոգել: Եթե երբևէ վերանորոգել եք ձեր բնակարանը, կպատկերացնեք, թե ինչի մասին է խոսքը: Երբ տեսնում ես, որ բնակարանդ հին է և ունի վերանորոգման կարիք, ժամանակ ես տրամադրում, գին վճարում, ամեն ինչ նորոգում և թարմացնում: Հետո քո բնակարանից հաճույք ես ստանում: Այդպես էլ պետք է նորոգենք մեր մտածելակերպը, որից հետո կփոխվի նաև մեր արտաքինը, շրջապատը: 

Ինչո՞ւ են մարդկանց մեջ հակառակություններ ծնվում: Պատճառը, հիմնականում, սխալ մտածելակերպն է: Ես միշտ օրինակ եմ բերում, որ երբ հանցագործները « Մերսեդես» են վարում, բնական է համարվում, իսկ երբ ազնիվ մարդն է լավ ավտոմեքենա վարում, անմիջապես հարցեր են ծագում` որտեղի՞ց, ինչպե՞ս, մանավանդ, եթե նա եկեղեցուծառայող է: Ոչ ոք չի ասում. « Փա՛ռք Քեզ, Աստվա՛ծ, որ նա լավ ավտոմեքենա ունի»: Ես ճանաչում եմ մի ծառայողի, ում արտասահմանում ավտոմեքենա էին նվիրել, սակայն նա հրաժարվել էր ընդունելուց` մտածելով, որ մարդիկ չեն հասկանա, թե որտեղից այդ ավտոմեքենան: Սա սխալ, չնորոգված մտածելակերպի արդյունք է: Եկեղեցու ծառայողը, ինչպեսև աշխարհի ցանկացած մարդ, կարող է ավտոմեքենա ունենալ: Մարդը կյանքի ամենա տարբեր բնագավառներում նոր մտածելակերպի կարիք ունի: Եվ յուրաքանչյուր անձ պետք է անհրաժեշտություն զգա՝ նորոգելու իր մտածելակերպը: Ինչոր մեկին նախանձելը չնորոգված մտածելակերպի արդյունք է: Զոհաբերելու անընդունակությունը նույնպես չնորոգված մտածելակերպի խնդիր է: Այս գրքի էջերում մենք կանդրադառնանք Աբրահամի կյանքին: Նրա միտքը լիովին նորոգված էր, այլապես չէր կարող զոհաբերել իր որդուն: Նորոգված մտածելակերպ ունեցող մարդիկ լավատես են: Նրանք կարող են մտնել մի չվերանորոգված տուն և ասել. «Հրաշալի տուն է, միայն պետք է վերանորոգել»: